 |
| Waandishi wa habari kutoka vyombo mbalimbali kutoka vyombo mbalimbali wakiwasikiliza viongozi wa shirika la posta tanzania wakati wakiwasilisha report ya mpango kabambe wa miaka kumi leo jijini dar es salaam.PICHA NA KAJUNASON BLOG |
(1)
Wakati Tanzania inaelekea kuadhimisha
miaka 50 ya Muungano, Shirika la Posta Tanzania limeanza utekelezaji wa Mpango
Kabambe wa miaka kumi (2014 hadi 2023) ikiwa
ni dira na mwelekeo wa kuliongoza Shirika hili liweze kujiendesha kibiashara,
kubuni na kutoa huduma mbadala, kutumia
teknolojia maridhawa na kukidhi mahitaji ya soko la huduma za mawasiliano
jumuishi.
(2)
Bodi ya Wakurugenzi ya Shirika hili ambayo
ni chombo cha juu cha utoaji maamuzi
ndani ya Shirika imeidhinisha utekelezaji wa mpango huu ambao umebuniwa kwa
kuzingatia matukio muhimu ya kihistoria pamoja na maendeleo ya sasa na mwelekeo
wa hapo baadae wa kibiashara, kiuchumi, kijamii na kiteknolojia hapa nchini na duniani kote.
(3)
Tangu miaka ya kabla na baada ya
Muungano wa Tanganyika na Zanzibar, Shirika la Posta ambalo ni Taasisi
mojawapo iliyoko chini ya muungano huu,
limejikita katika kutekeleza wajibu wake wa kuhakikisha kuwa huduma za
mawasiliano jumuishi hasa yale ya msingi
zinawafikia watu wote wa mijini na vijijini (universal service obligation) katika
Jamhuri ya Muungano wa Tanzania.
(4)
Mantiki hii ya kuweka umuhimu wa
kusambaza mtandao wa ofisi na vituo vya Posta ili kuwafikia watu wengi zaidi
unazingatia hali halisi ya kihistoria kuwa huduma hizi ndizo zenye gharama
nafuu zinazowezesha wananchi wengi kupata haki ya msingi ya kuwasiliana na
kufanya miamala ya kijamii, kibiashara na kiuchumi kupitia ofisi za Posta.
(5)
Ili kuhakikisha kuwa Shirika la Posta
linaendelea kutekeleza wajibu huu wa kihistoria na pia linashiriki kikamilifu katika utekelezaji wa sera na mipango ya sasa
na ya baadae katika mazingira mapya na kushiriki ipasavyo kwenye kuharakisha maendeleo ya Tanzania kuwa nchi ya uchumi wa
kati ifikapo mwaka 2025, Shirika pamoja na kujiwekea mipango ya muda mrefu
(Mpango Kabambe – Master Plan 2014/2023)
pia limejiwekea mipango ya muda wa kati ambao ni Mpango Mkakati wa miaka mitano
(Strategic Plan 2014 – 2018) ambao
utekelezaji wake umeanza na Mpango wa mwaka huu wa 2014.
(6)
Mipango hii ya muda mrefu, muda wa kati
na muda mfupi ni mwendelezo wa mkakati
mpya utakaoleta mabadiliko katika uendeshaji na utoaji wa huduma za Posta
nchini ili kukabiliana na changamoto zinazoletwa na utandawazi, mapinduzi ya
teknolojia na mabadiliko ya mionjo ya wateja.
(7)
Katika kuhakikisha kuwa Shirika
linashiriki na kuchangia kikamilifu matumizi ya TEHAMA, msukumo umewekwa kwa
lengo la kupiga hatua katika utekelezaji na uwekaji wa mfumo wa kisasa wa mawasiliano (Automation Programmes) kwa awamu kwa kuanzia na ofisi za Posta
zipatazo 86 hapa nchini ili kutoa huduma kwa ufanisi zaidi, kuongeza idadi ya
wateja wanaohudumiwa, kuondoa uchelewesho na kupunguza malalamiko kwa wateja.
(8)
Aidha, Shirika limeunganishwa katika
mfumo wa elektroni wa kimataifa (International
Postal Systems) ambao unawezesha ufuatiliaji (Track and Trace) wa nyaraka na vipeto vinavyopitia EMS, Rejista,
Vifurushi vya kimataifa vinavyopitia katika mtandao wa ofisi za Posta. Lengo la Shirika ni kuwawezesha wananchi na
wajasiriamali wa kawaida kunufaika na maendeleo ya teknolojia na ubunifu uliopo
hapa nchini na duniani, hivyo kufanya amali za kijamii, kibiashara na kiuchumi
kwa uhakika zaidi.
(9)
Katika mwelekeo huu wa matumizi ya
TEHAMA, Shirika litaendelea kupanua mifumo na kujiimarisha zaidi katika matumizi ya Teknolojia hiyo hadi kufikia
ofisi za wilaya na miji midogo, kwa lengo la kurahisisha ufikishaji wa huduma,
sampuli na bidhaa za wateja mpaka
majumbani/maofisini kwao.
(10)
Vile vile mtandao wa ofisi za Posta
utaweza kufikisha bidhaa zitakazonunuliwa na wateja kupitia mtandao wa Internet
(e-commerce) na kuwajengea uwezo
wananchi wa kawaida katika matumizi ya mtandao wa mawasiliano ya kisasa kupitia Vituo vya
Mawasiliano kwa Jamii (CIC) ambavyo viko kwenye baadhi ya ofisi za Posta.
(11)
Lengo ni kuongeza vituo vya mawasiliano
kwa Jamii (CIC) ili kuwawezesha wananchi wengi zaidi wanufaike na huduma za
kisasa ikiwa ni pamoja na elimu mtandao (E-Education
au distance learning), biashara
mtandao (E-commerce), Serikali mtando
(E-Government), matibabu mtandao (E-medicine) na huduma nyingine za
kiuchumi na kijamii kupitia ofisi na vituo vya Posta.
(12)
Aidha chini ya mipango hiyo, utekelezaji
wa mfumo mpya wa Anuani za Makazi na Postikodi (Physical
Address and Postcode System) umeanza na umelenga kila mwananchi kuwa na
anuani kamili inayotambulisha makazi yake.
Mfumo mpya wa anuani unaweka msukumo na shinikizo katika kutoa huduma
mtambuka (cross-cutting services) zinazofikia
viwango vya kimataifa.
(13)
Shirika la Posta Tanzania kwa upande
wake linaendelea kujizatiti ili kuhakikisha kuwa mfumo huu wa Anuani za Makazi
na Postikodi unaanza kazi mwaka huu hususan kwenye maeneo machache ambayo majina
ya mitaa yamewekwa na namba za nyumba zimebandikwa.
(14)
Postikodi ni mfumo wa anuani unaotumia
utambulisho maalum katika kumfikishia mteja huduma za kijamii, kiuchumi na kibiashara
pamoja na barua, nyaraka, vifurushi na vipeto kwenye makazi/ofisini. Anuani kamili lazima iwe na majina kamili ya
mtumiwa, majina ya mtaa, nambari ya nyumba na postikodi.
(15)
Wote tunafahamu kuwa mfumo wa anuani
unaotumika hivi sasa hapa nchini kwetu
ni wa masanduku ya kupokelea barua yaliyoko kwenye ofisi za Posta. Mfumo huu humlazimisha mteja kufuata barua,
vifurushi na vipeto katika ofisi za Posta kupitia sanduku
alilokodisha. Kwa hivi sasa huduma za EMS na pCUM pekee ndizo zenye fursa kwa mteja kupelekewa barua,
nyaraka, vipeto na vifurushi kwenye makazi au ofisini.
(16)
Chini ya mfumo huu wa Postikodi, uchambuzi wa barua utafanyika
kwa ufanisi na haraka zaidi, utarahisisha utambuaji wa anwani kwa digitali,
utaongeza ufanisi katika usafirishaji na usambazaji wa barua, nyaraka,
vifurushi, vipeto, na mizigo. Aidha
mfumo mpya utaongeza ufanisi katika kuhudumia wateja na kupunguza na kuondoa
uwezekano wa kuwepo makosa katika uchambuzi, usambazaji na ufikishaji wa mali za wateja pamoja na huduma nyinginezo
za kijamii, kibiashara na kiuchumi.
(17)
Katika ngazi ya kimataifa Jamhuri ya
Muungano wa Tanzania ni mwanachama wa Umoja wa Posta Duninai (Universal Postal Union) ambapo Tanzania
ilijiunga mwaka 1963 na kwa hivi sasa ni moja ya taasisi za Umoja wa Mataifa. Malengo ya umoja huo ni pamoja na kuisimamia (regulate) sekta ya Posta pamoja na kutoa
ushauri, usuluhishi, kuunganisha ushirikiano baina ya nchi wanachama na kutoa/kujengea
uwezo wa kiufundi nchi wanachama.
(18)
Kupitia umoja huo suala la ubora na usalama katika usambazaji wa barua, nyaraka, vipeto,
vifurushi na miamala ya kimataifa kupitia Posta unazingatiwa, ambapo viwango
vya ubora na usalama vimewekwa kwa kila nchi mwanachama kuzizingatia. Pia Shirika linapata nafasi kubadilishana
uzoefu katika shughuli mbalimbali za posta baina ya nchi wanachama na kujifunza
kutoka nchi zilizoendelea juu ya uendeshaji na maboresho ya huduma za
mawasiliano jumuishi kupitia mtandao wa ofisi za Posta.
(19)
Ubora, ukubwa na ufanisi (qualitative
and quantitative) wa mtandao wa mawasiliano ya posta ni kigezo muhimu cha
kiwango cha maendeleo ya jamii kitaifa na kimataifa. Kwa mfano kwa kuzingatia takwimu za sasa za
Umoja wa Posta Duniani (UPU), idadi ya ofisi za posta duniani inafikia 660,000
ambapo idadi ya ofisi hizi katika Bara la Afrika ni takriban 16,000 ambazo ni
karibu ya asilimia 2.3 ya ofisi zote za
Posta duniani huku idadi ya watu duniani asilimia 13 wanaishi kwenye
Bara la Afrika.
(20)
Aidha takwimu za Shirika la Umoja wa
Posta duniani zinaonyesha kuwa wastani wa idadi ya barua kwa kila mtu mmoja (letter per capital) ni wastani wa barua 66 kwa dunia nzima kwa mtu
mmoja, kwa nchi zilizoendelea (nchi za viwanda) mtu mmoja ni wastani wa barua
403, nchi za Bara la Asia ni barua 12, bara la Afrika hususan kusini mwa Jangwa
la Sahara ni wastani wa barua 3 kwa mtu, na hapa kwetu Tanzania wastani wa
barua zinazopitia Posta ni chini ya barua moja kwa mtu.
(21)
Takwimu hizi zinaonyesha uwepo wa
changamoto katika nchi yetu na Bara la Afrika kwa ujumla.
(22) Licha ya kwamba shughuli za posta ni
mtambuka na zinajumuisha majukumu mengine ya kijamii, kiuchumi na kibiashara
ndani ya mwavuli wa uwakala (Agency
Services) ambazo ni pamoja na miamala ya kutuma, kupokea na kulipa fedha,
msingi na historia ya Posta imejikita katika shughuli za kupokea, kuhudumia,
kusafirisha na kufikisha barua, nyaraka, vifurushi na vipeto.
(23)
Sisi Shirika la Posta tunayo dhamira
chini ya mipango yetu ya muda mrefu, muda wa kati na muda mfupi ya kubadilisha hali hii, ili ifikapo mwaka 2025,
Tanzania iwe katika kiwango cha ubora kinacholingana na nchi za uchumi wa kati
kwenye tasnia ya shughuli za Posta.
(24)
Ni dhahiri kuwa, ili Shirika hili liweze
kutekeleza kwa ufanisi mipango yake na kufikia malengo yanayotarajiwa,
ushirikiano na michango ya wadau wote inahitajika.
(25)
Shirika la Posta Tanzania linayo nia na
sababu za maboresho na mageuzi yatakayoleta ufanisi na tija katika majukumu
yake, na limejipanga vizuri kwa lengo la kufikia dhamira yake. Penye nia kuna njia.
Imetolewa na:
OFISI YA POSTAMASTA MKUU
SHIRIKA LA POSTA TANZANIA
MTAA WA OHIO/GHANA
S.L.P. 9551,
POSTIKODI: 11300
DAR ES SALAAM
21 MACHI, 2014
No comments:
Post a Comment