ANGALIA HAPA KUJUA KILICHOJIRI KATIKA KONGAMANO LA WATOTO WA KIKE LILILOANDALIWA NA CDF

Leo ikiwa ni tarehe 9 mwezi wa 11 Jukwaa la Utu wa Mtoto(CDF) likiwa chini ya udhamini wa Shirika la Maendeleo la Uswidi(Sweden International Development Cooperative Agency–SIDA) limeandaa kongamano la wasichana lililofanyika mapema leo katika ukumbi wa Lamada hotel Ilala boma jijini Dar es salaam.

Baadhi ya mabinti wakifanya igizo katika Kongamano la Watoto wa Kike lililoandaliwa na Jukwaa la Utu wa Mtoto CDF  mapema leo jijini Dar es salaam

Mgeni Rasmi katika kongamano hilo alikuwa ni Mkurugenzi Mwandamizi wa Shirika la Maendeleo la Uswidi(Sida) Ms. Carin Jamtin akiwa ameambatana na Mkuu wa Idara ya Mahusiano na Maendeleo Ms. Ulf Kallsting, lakini pia kongamano hilo liliudhuliwa na viongozi mbalimbali wa serikali wakiwemo Maafisa Maendeleo na Ustawi wa jamii, Walimu, Polisi, Wanafunzi pamoja na wasichana walio nje ya shule.

Akiongea na waandishi wa habari mapema leo Mkurugenzi wa CDF Bw. Koshuma Mtengeti alisema kuwa Kongamano hilo limekutanisha washiriki mbalimbali wakike na wakiume, waathirika wa mimba za utotoni na hata wale ambao bado wapo mashuleni ili kuwajengea uwezo wa kulinda na kutetea haki za mtoto wa kike.

Mkurugenzi Mtendaji wa Jukwaa la Utu wa Mtoto (CDF) akitoa ufafanuzi wa jambo fulani katika Kongamano la watoto wa kike lililoandaliwa na shirika hilo mapema leo jijini Dar es salaam.

Na pia lengo kuu la kongamano hilo likiwa ni watoto wa kike kupata nafasi ya kukutana na Mkurugenzi Mwanandamizi wa Shirika la Uswidi na kumuelezea mafunzo pamoja na miradi mbalimbali inayoendeshwa na CDF katika ukombozi dhidi ya mtoto wa kike katika mambo kama. Ukeketaji, Mimba za utotoni, Ndoa za utotoni, ukatili wa kijinsia pamoja na kuonesha shughuli za ujasilimali ikiwa ni kama mafanikio ya mradi wa CDF.

Lakini pia katika kongamano hilo mabalozi wa CDF wanaume na wavulana wamepewa fursa ya kuelezea namna wanavyofanya kazi zao kama mabalozi na jinsi wanavyojitahidi kuelimisha jamii juu ya mdahara ya ukeketaji, ukatili wa kijinsia na ndoa pamoja na mimba za utotoni.

Mkurugenzi Mwandamizi wa Shirika la Maendeleo  Uswidi ( Swedish International Development Cooperative Agency-SIDA) Carin Jamtin akitoa ufafanuzi wa jambo fulani katika kongamano la watoto wa kike lililofanyika mapema leo jijini dar es salaam.

Mkurugenzi huyo aliendelea kwa kusema kuwa Polisi, Maafisa Maendeleo na Ustawi wa jamii na viongozi wengine wa serikali wamepata nafasi ya kuonyesha ni kwa namna gani wameweza kufanya kazi na kushirikana na CDF katika kulinda na kutetea maslahi na haki za mtoto wa kike.

Akiongea katika kongamano hilo Mkurugenzi Mwandamizi wa shirika la la maendeleo la Uswidi(SIDA) Carin Jamtin, amesema shirika lao limekuwa likitetea haki za watoto kwa kuhakikisha watoto wakike na wakiume wanakuwa na haki sawa katika jamii hususani haki ya kupata elimu.