HALI YA MAISHA NI NGUMU Pole Pole AACHE PROPAGANDA ZA KITOTO
DHIDI YA ACT Wazalendo
Juzi tarehe 21Juni,2017 akihutubia wananchi kwenye viwanja vya
Bwawani, Kibaha Mjini, Mwenyekiti wa CCM, ndugu John Magufuli alitumia fursa
hiyo kumruhusu Katibu wa Itikadi na Uenezi wa chama chake, ndugu Humphrey
Polepole kumwingiza CCM mtu mmoja aliyesemwa kuwa ni Mwenyekiti wa Chama cha
ACT Wazalendo Mkoa wa Pwani.
Kama Chama umekuwa msimamo wetu wa siku nyingi kutowajibu watu
wanaohama Chama chetu au kuwapa mkazo mkubwa watu wanaohamia Chama chetu.
Tangu kuasisiwa kwa siasa za mageuzi hapa nchini, imekuwa ni
kawaida kwa watu kutoka Chama kimoja kwenda kingine, Utitiri wa watu wamefanya
hivyo kwa muda mrefu. Si jambo linalostaajabisha hata kidogo.
Lakini, leo tumelazimika kulitolea ufafanuzi tukio la Kibaha kwa
sababu liligubikwa na uwongo wa dhahiri, hadaa, na propaganda za kitoto za
Polepole.
Mtu aliyesemwa kuwa
Mwenyekiti wa ACT Wazalendo Mkoa wa Pwani, Isihaka Juma Karanda,si tu kwamba
mtu huyo si Mwenyekiti bali hana nafasi yeyote katika Kamati ya Uongozi ya Mkoa
wa Pwani na si mwanachama kabisa wa Chama chetu.
Mwenyekiti Chama cha ACT Wazalendo, Mkoa wa Pwani ni Mimi hapa
mbele yenu Mrisho Swagara. Katibu wangu ni ndugu Amina Batash. Kamati yetu ya
uongozi ya Mkoa wa Pwani imeshangazwa sana na propaganda hizi za Polepole na
chama chake, ambazo ziliendeshwa kwa kutumia kodi zetu wananchi.
Jambo hili la propaganda za kitoto za CCM dhidi ya ACT
Wazalendo ni mwendelezo wa harakati za Chama hicho kuwahadaa watanzania
wasizungumzie hali mbaya ya chakula na usalama, pamoja na ugumu wa maisha,
masuala ambayo chama chetu kimejikita katika kuyasemea.
Katika wakati ambao uchumi wa nchi unaanguka, hali mbaya ya
usalama mkoani Pwani, kukiwa na mfumuko wa bei wa bidhaa wa kutisha, hasa
vyakula, ingetarajiwa kuwa chama makini kingejikita kuisimamia Serikali yake
irekebishe masuala hayo. Lakini kwa masikitiko kabisa CCM wamejikita kwenye
propaganda za kitoto kabisa dhidi ya Chama pekee kinachosimamia mambo ya
wananchi, chama cha ACT Wazalendo. Hili ni jambo la aibu sana.
Kwaniaba ya Chama changu, Viongozi wenzangu wa Mkoa wa Pwani,
nawaasa Watanzania wenzangu wazipuuze propaganda hizo za CCM zinazofanywa kwa
gharama kubwa ya kodi zetu.
Ni muhimu Watanzania
tuutumie muda huu kuhoji juu ya masuala muhimu yanayotugusa sisi wananchi,
uhaba wa madawa hospitalini, hali ngumu ya maisha, kukosekana ajira kwa vijana,
pamoja na kupanda kwa gharama za bidhaa kulikotokana na mfumuko mkubwa wa bei.
Uongo huo wa viongozi wa CCM unadhihirisha namna chama hicho
kilivyo cha hovyo na kinavyoweza kufanya mambo ya hovyo kwa ajili ya
kumfurahisha mwenyekiti wao
Kiusalama ni muhimu kwa wasaidizi wa Mwenyekiti wa CCM
Kujiridhisha juu ya masuala mbali mbali yanayofikishwa mbele ya Rais ili
wasimshushie hadhi kiongozi huyo wa nchi kwa ajili ya wachache kutaka sifa za
kuonekana ni wachapakazi wanaokubaliwa katika maeneo yao.
Mrisho Swagara
Mwenyekiti wa Mkoa
wa Pwani - ACT Wazalendo
Juni 22, 2017
No comments:
Post a Comment