WAFANYABIASHARA WANAWAKE WATAKIWA KUUNGANA KWA PAMOJA KUTETEA HAKI ZAO

Mkurugeni Mtendaji wa Taasisi ya REPOA Profesa SAMWELI WANGWE akizungumza wakati wa ufunguzi wa mkutano huo wa siku mbili unaoendelea jijini Dar es salaam

 Wanawake wafanyabiashara Masokoni na wajasiriamali nchini wametakiwa kungana na kuunda umoja imara kwa lengo la kufikisha matatizo yao kwa pamoja kwa watunga sera na serikali ili waweze kuchangia katika kukuza uchumi wa Taifa.

Rai hiyo imetolewa leo Jijini Dar es salaam na Mkurugeni Mtendaji wa Taasisi ya REPOA Profesa SAMWELI WANGWE katika kongamano la siku mbili lililowakutanisha wanawake wafanyabishara masokoni kutoka zaidi ya mikoa tisa nchini Tanzania ambapo amesema kuwa ipo haja ya wanawake hao kuungana kwa pamoja kutetea haki zao kwani ni ukweli usiopingika kuwa wanachangia kwa kiasi kikubwa sana katika ukuaji wa uchumi wa Taifa.

Wanawake mbalimbali ambao ni wafanya biashara katika masoko wakisikiliza kwa makini wakati mkutano huo ukiendelea mapema leo

Amesema kuwa wanawake wajasiriamali nchini ambao wanafanya biashara zao katika masoko mbalimbali wamesahaulika sana na serikali na mamlaka husika jambo ambalo limesababishwa na wanawake wenyewe kutokuwa na umoja ambao unaweza kutoa sauti moja kwenda serikali kudai haki zao.

Anaongeza kuwa kundi kubwa la wanawake ambao ni wajasiriamali nchini wamekuwa hawaguswi moja kwa moja na ukuaji wa uchumi wa Taifa kwa kuwa wamekuwa hawashirikishwi katika mambo ya msingi ambayo yatawasaidia kuinua uchumi na biashara zao binafsi jambo ambalo linafanya uchumi wa Taifa kukua lakini haumgusi moja kwa moja mwanamke huyo ambaye yupo katika biashara zake.

Mkurugenzi wa shirika lisilo la kiserikali la EQUALITY FOR GROWTH (EFG) akifanya mahojiano na wanahabari kuhusu lengo la kuandaa mafunzo hayo maalum kwa wanawake hao 

Aidha ameongeza kuwa tatizo lingine linalowakumba wakina mama hao ni kutokutengewa mazingira mazuri na manispaa husika kwa ajili ya kufanyia biashara zao kama ilivyo katika mataifa mengine jambo ambalo limekuwa likiwapatia usumbufu mkubwa wakina mama hao katika harakati zao za kufanya biashara.

Akizufumza na mtandao huu Mkurugenzi wa shirika lisilo la kiserikali la EQUALITY FOR GROWTH (EFG) ambao ndio waandaaji wa Kongamano hilo la siku mbili Bi JANE MAGIGITA amesema kuwa kongamano hilo limeandaliwa mahususi kwa ajili ya wanawake hao kuwasaidia kutambua majukumu yao na kuwaunganisha kwa pamoja kwa lengo kutambua haki zao na mahali pa kuzipata.

Picha ya pamoja kwa washiriki wa mkutano huo

Amesema kuwa wanawake wanaofanya kazi katika masoko ya Tanzania wamekuwa wakikumbana na matatizo mengi kama kukosa sehemu halali za kufanyia biashara,uonevu kutoka kwa wanaume,uelewa mdogo wa sheria za biashara na elimu ya biashara jambo ambalo amesema kuwa wanahitaji makongamano kama hayo ili yawasaidie katika kuzitambua haki na shughuli zao.