KESI DHIDI YA PINDA...MAPINGAMIZI 119 YAWAKILISHWA KWENYE KESI DHIDI YA WAZIRI MKUU MIZENGO PINDA ILI KUMNASUA MAHAKAMANI...! SOMA HAPA

KAMATI ya Vijana Wapenda Amani Tanzania, wanatarajia kuwasilisha mapingamizi 119 wakiomba kesi dhidi ya Waziri Mkuu, Mizengo Pinda itupwe kwani ilifunguliwa kinyume cha Katiba. Pinda alishitakiwa kikatiba Mahakama Kuu Kanda ya Dar es Salaam, kutokana na kauli aliyoitoa bungeni hivi karibuni akiruhusu Jeshi la Polisi kuwapiga raia wanaokaidi amri halali za jeshi hilo.

             Kesi hiyo iliyofunguliwa na mawakili mbalimbali, itasikilizwa na majaji watatu wakiwamo Jaji Kiongozi, Fakih Jundu, Jaji Augustine Mwarija na Jaji Dk. Fauz Twaib.

              Taarifa hiyo ilibainishwa jana katika barua iliyoandikwa na kamati hiyo kupitia wakili wao, Sweetbert Nkuba kwenda kwa Mwanasheria Mkuu wa Serikali na Mahakama Kuu kupatiwa nakala.

              Nkuba aliwasilisha barua kwa Mwanasheria Mkuu wa Serikali, Jaji Frederick Werema akiomba wateja wake kuingizwa katika kesi hiyo kwa ajili ya kumtetea Pinda.

            Nkuba alisema kesi hiyo isipofutwa itakuwa na athari kiserikali, kwani mahakama itakuwa imeruhusu watu wasiokuwa na shughuli maalumu kukwamisha mipango ya Serikali.

“Tutakapokubaliwa kuingia katika kesi, tunatarajia kuwasilisha mapingamizi 119 mahakamani tukiomba kesi hiyo itupiliwe mbali kwani imefunguliwa kinyume na Katiba.

“Kama mahakama itakubali kuendelea na kesi dhidi ya Waziri Pinda, Serikali itashindwa kufanya kazi yake kwa sababu kila maamuzi yanayotolewa na viongozi yatakuwa yanapingwa mahakamani na makundi ya watu wasiokuwa na shughuli maalumu.

“Tunaweza kukubaliwa kuingia katika kesi kwa sababu tayari tuna watu 2,000 waliosaini wakipinga waziri mkuu kushtakiwa,” alidai wakili Nkuba.

        Kituo cha Sheria na Haki za Binadamu (LHRC) kwa kushirikiana na Chama cha Wanasheria Tanganyika (TLS), walifungua kesi namba 24 ya mwaka 2013, wakipinga kauli hiyo ya waziri mkuu.

          Katika hati ya madai inadaiwa kwamba Mei mwaka huu, Pinda akiwa bungeni kama waziri mkuu kinyume na Katiba, alitoa kauli ya kuruhusu askari wa Jeshi la Polisi kuwapiga raia ambao hawatatii amri yao.

“Kama wewe umekaidi, hutaki, unaona kwamba ni imara zaidi, wewe ndio jeuri zaidi watakupiga tu na mimi nasema muwapige tu kwa sababu hakuna namna nyingine, eeh maana tumechoka sasa,” ilieleza sehemu ya hati hiyo ikinukuu kauli ya Pinda.

             Wanadai kwa mujibu wa utekelezaji wa sheria za jinai, kauli inayotolewa na kiongozi mwenye wadhifa wa waziri mkuu, ni amri inayopaswa kutekelezwa na vyombo vya dola kama Polisi.