NI SAMWELI SITTA TENA

     

       Kufuatia kile kilicho kuwa kikisubiriwa kwa hamu na watanzania wengi Kutoka Bungeni mjini Dodoma katika Suala la Uchaguzi wa kumchagua mwenyekiti wa Bunge maalum la Katiba Hatimaye Mh.Samweli sitta ameweza kuibuka Kidedea muda huu Bungeni Mjini Dodoma Baaada ya Kuchaguliwa Kuwa Mwenyekiti Halali wa Bunge Hilo la Katiba.

            

       Katika uchaguzi huo uliofanyika jioni hii mjini Dodoma wajumbe wa bunge maalum la katiba wamemchagua Bwana Samuel Sitta mjumbe kutoka chama cha mapinduzi CCM, kuwa mwenyekiti wa kudumu wa bunge hilo baada ya kumshinda mgombea mwenzake, Hashim Rungwe aliyetokea chama cha NCCR MAGEUZI.

         Samuel Sitta amechaguliwa kwa kupata ushindi wa kura 487 dhidi ya mgombea mwenzake Hashim Rungwe aliyepata kura 69 kutokana na kura 563 za wajumbe wa bunge hilo waliopiga kura na hatimaye kutangazwa na msimamizi wa kura hizo

         

      Mwenyekiti wa kudumu wa Bunge maalum la Katiba pamoja na majukumu mengine atakuwa na kazi ya Kuongoza mikutano na vikao vya bunge maalum la katiba, kuongoza mwenendo wa utaratibu wa majadiliano katika vikao vya bunge hilo na kutoa uamuzi kuhusu masuala yote ya taratibu kwa kusimamia amani na utulivu katika vikao vya bunge

       

        Aidha Mwenyekiti wa Kudumu wa bunge maalum la katiba atakuwa na madaraka ya kutafirsi kanuni ambazo wamezipitisha na uamuzi wake utakuwa ni wa mwisho, isipokuwa katika kutekeleza majukumu yake ataongozwa na sheria na kanuni walizozipitisha na pale ambapo kanuni hazikutoa mwongozo ataongozwa na kanuni nyingine za nchi pamoja na mila na desturi za nchi..

       Samuel Sitta ambaye pia ni Waziri wa sasa wa Afrika Mashariki amewahi kuwa spika wa Bunge la Jamhuri ya Muungano wa Tanzania katika bunge la tisa kipindi cha awamu ya kwanza ya awamu ya nne ya uongozi wa Rais Jakaya Kikwete na ameondoka na historia ya kufanyika mageuzi makubwa ndani ya bunge wakati wa uongozi wake kwa mijadala ya wazi kwa wabunge wa pande zote kwa falsafa aliyojiwekea ya viwango na spidi, ambayo pia ameingia nayo katika kuwania uenyekiti wa kudumu wa bunge hili la katiba. Ana taalum ya sheria.

         Hashm Rungwe naye amewahi kuteuliwa na chama chake na kugombea Urais wa Jamhuri ya muungano wa Tanzania katika uchaguzi mkuu wa mwaka 2005, naye pia ni mwanasheria