exclusive-MKASA WA KUVAMIWA GARI LA MAABUSU JANA DAR,KAMISHNA KOVA AELEZA MCHEZO MZIMA,SASA WALIOUSIKA KUSAKWA

Jeshi la Polisi Kanda Maalum ya Polisi Dar es Salaam kwa kushirikiana na Jeshi la Magereza linafanya uchunguzi kuhusu tukio la kushambalia bus la Magereza namba T0046 iana ya ISUZU tukio lililotokea tarehe 02.07.2014  maeneo ya Mikocheni karibu na Regency  Hotel Kata ya Msasani Wilaya ya Kipolisi ya Oysterbay Mkoa wa Kipolisi Kinondoni.

Siku hiyo majira ya saa 13:30 mchana watu wasiofahamika walilishambulia bus la Magereza ikiendeshwa na askari Magereza namba A.9716 SGT MUSOFE wakati Bus hilo likiwa na mahabusu wapatao 15 likitokea Mahakama ya Mwanzo Kawe kupelekwa mahabusu ya ya Gereza la Segerea wakisindikizwa na askari Magereza pamoja na askari Polisi kwa wakati mmoja. Ghafla wakiwa kwenye foleni ya magari walitokea watu wawili wakitembea kwa miguu wakielekea mahali gari lilipo mmoja kati ya watu hao alianza kufyatua risasi hovyo kuelekeza kwenye gari hilo.

Tukio hilo lilisababisha kioo cha mbele, cha nyuma, na ubavuni kushoto kuvunjika. Pia askari 03 walijeruhiwa ambao ni A.9716 SGT MUSOFE, Miaka 39, Dereva wa Bus, askari Magereza, Mkazi wa Segerea  ambaye alipata majeraha kiasi katika mkono wa kulia, Askari wa Polisi wa kike WP.4481 CPL DOTTO askari Polisi Miaka 33, Mkazi wa Tegete Kanisani  yeye alijeruhiwa kwa risasi kwenye titi lake la upande wa kushoto na amelazwa Hospitali ya Taifa Muhimbili kwa matibabu na hali yake inaendelea vizuri. Mwingine ni mahabusu aitwaye DOREEN D/O DAMIAN Miaka 19, Mkazi wa Tegeta kwa Ndevu ambaye alitibiwa na kuruhusiwa.

Nawaomba wananchi walisaidie Jeshi la Polisi kwa kutoa taarifa sahihi ili watu au kundi la aina hii ya ujambazi liweze kubainika, wakamatwe na hatimaye wafikishwe mbele ya mkono wa sheria kama walivyotoa taarifa zilizosababisha kukamatwa kwa watuhumiwa wa mauaji ya mtawa na tukio la Uporaji katika Benki ya Barcrays tawi la Kinondoni.