DIWANI MTANGAZAJI INAWEZEKANA ?

 Ameandika @exaud_msaka_habari1

Wakati wa Uchaguzi Mkuu wa Mwaka 2025 kuna tangazo lilitoka Bodi ya Ithibati @ithibatitz kwenda kwa wanahabari hasa wale waliokuwa wanataka kugombea nafasi mbalimbali

Tangazo lile lilkelekeza kuwa kama unataka kuwania nafasi za kisiasa basi pumzika kwanza uandishi wa habari ili usiwachanganye watu na uwe huru kufanya siasa vizuri. Jambo jema sana

Kwa fikra zangu nadhani tangazo lililenga kuepuka kuwa na waandishi wa habari ambao wana mapenzi na siasa za vyama, yani ni mfia chama cha siasa 

Sasa leo nimepata mtanzuko kidogo, inakuaje mwandishi wa habari ambaye ameshashinda nafasi ya kisiasa na anaitumikia anarudi studio akiwa na cheo chake na Chama chake alafu anaendelea kuhudumu kama mtangazaji ? 

Itawezekana kweli apokee mshahara wake wa udiwani alafu aje aitendee haki nafasi yake ya utangazaji ? 

Studio akija mtu ambaye ni hasimu wa chama chake atamhoji kama mtangazaji au atamhoji kama diwani kutoka chama chake ? 

Na Je Akija mgeni kama huyo atakuwa huru kweli kuhojiwa na mtu ambaye anajua kabisa hawezi kumsikilza maana kuna maslahi anayalinda na ndio wanamlipa ? 

Au mimi kuna mahali sjaelewa nisaidiwe ila kiuhalisia kwangu ina ukakasi kidogo.

TOFAUTI YA MWANDISHI WA HABARI NA MWANASIASA

 

Anaandika @exaud_msaka_habari1 

MWANDISHI WA HABARI NI NANI

Mwandishi wa habari ni mtu ambaye ameamua kuwa Daraja kwa wananchi, mtu ambaye ameamua kufanya kazi ya kuwasikiliza watu ambao hawasikilizwi na kuwaweka mbele ili wasikike

Anaruhusiwa kusifia sana pale ambapo panahitaji sifa na anaruhusiwa kukosoa pale ambapo kunahitajika kukosoa, huku akifuata sheria za nchi na taaluma yake pamoja na miongozo ya taaluma husika

Mwandishi huyu anaendeshwa na ukweli, heshima kwa wengine na weledi mkubwa huku akitakiwa kutomuonea mtu kwa sababu ya kalamu au Mic yake

Katika kila analofanya huyu bwana anatakiwa asahau kabisa kuhusu maslahi yake, wala hatakiwi kujiuliza anapata nini, swali muhimu anatakiwa ajiulize jamii inapata nini, wananchi watasikika wanachotaka ? 

MWANASIASA NI NANI ? 

Mwanasiasa ni mtu ambaye anatumia ushawishi wake wa maneno, vitendo na vitu vingine kupendwa na wananchi ili wampe madaraka

Anaweza kushawishi kwa kuwaletea maendeleo (Kitu ambacho ni sahihi) anaweza kushawishi kwa kuwapa maneno ya matumaini (inaruhisiwa) na wasio weledi wanaweza kutumia pesa (Rushwa) 

Baadhi ya wanasiasa kazi yao inawalazimu kutumia maneno ya uongo ili kufanikisha malengo yao

Mwanasiasa yupo tayari afanye jambo lolote, aseme lolote ili kulinda nafasi yake, kwa sababu kwenye siasa kupoteza cheo inaonekana kama ni kupoteza nusu ya maisha

Tofauti na taaluma ya habari, mwanasiasa haendeshwi na Kanuni za taaluma yake (siasa sio taaluma) hana miongozo mingi sana na kipimo chake ni wananchi wakimpenda kwa njia yoyote

HITIMISHO

Ukisoma hadi hapo utagundua fani hizi mbili haziwezi kukaa kwenye kichwa cha mtu mmoja na zikafanikiwa

Yani mwanasiasa ambaye analalamikiwa na wananchi ndio awe daraja kati ya wananchi na mwanasiasa yani awe mwandishi wa habari ? Atasema nini kwenye Mic pale ambapo upande wake wa siasa unahitaji kukosolewa, yani ajikosoe ? 

Taaluma ya habari ni eneo ambao halitakiwi kuchanganywa na kitu kingine chochote......